ܡܲܪܚܲܫܬܵܐ ܒܐܘܼܪܚܵܐ ܕܨܵܪܘܿܝܘܼܬܵܐ

ܡܲܪܚܲܫܬܵܐ ܒܐܘܼܪܚܵܐ ܕܨܵܪܘܿܝܘܼܬܵܐ ܒܸܚܒ݂ܵܫܵܐ ܝܠܵܗ̇ ܚܕܵܐ ܥܵܡܵܠܝܼܬܵܐ ܬܚܘܼܬ ܚܲܕ ܡܲܬܒ݂ܸܢܵܢܵܐ ܩܲܠܘܼܠܵܐ ܠܸܚܬܵܡܘܿܗ̇ ܒܛܝܼܢܘܼܬܵܐ.

ܡܘܿܕܝܼ ܝܠܵܗ̇ ܗܵܝ ܦܵܣܘܿܥܬܵܐ ܩܲܕܡܵܝܬܵܐ؟

ܡܸܢ ܩܲܕ݇ܡ ܕܡܲܪܝܸܙܲܬܝ ܚܲܕ ܘܲܥܕܵܐ، ܐܵܢܲܢܩܵܝܬܵܐ ܝܠܵܗ ܕܝܵܕܥܲܬܝ ܟܡܵܐ ܫܵܒ݂ܘܿܥܹ̈ܐ ܒܛܝܼܢܬܵܐ ܝܘܲܬܝ ܘܒܹܝܬ ܐܵܣܝܘܼܬܵܐ ܡܘܿܕܝܼ ܡܵܨܹܐ ܕܥܵܒ݂ܸܕ ܩܵܐܠܵܟ݂ܝ. ܐܸܢ ܠܹܐ ܝܘܲܬܝ ܚܲܬܝܼܬܬܵܐ (ܐܲܟܝܼܕܬܵܐ) ܟܡܵܐ ܫܵܒ݂ܘܿܥܹ̈ܐ ܒܛܝܼܢܬܵܐ ܝܘܲܬܝ، ܒܲܠܟܵܐ ܕܣܵܢܩܲܬܝ ܕܥܵܒ݂ܕܲܬܝ ܚܕܵܐ ܨܲܚܨܵܝܬܵܐ ܕܐܲܠܬܪܵܐܣܵܘܢܕ.

ܨܲܚܨܵܝܬܵܐ ܕܐܲܠܬܪܵܐܣܵܘܢܕ ܟܹܐ ܡܲܕܥܸܝܵܐ ܠܵܟ݂ܝ ܟܡܵܐ ܫܵܒ݂ܘܿܥܹ̈ܐ ܒܛܝܼܢܬܵܐ ܝܘܲܬܝ. ܥܝܵܕܵܐܝܼܬ ܒܘܼܫ ܨܦܵܝܝܼ ܝܠܵܗ̇ ܕܣܵܒܪܲܬܝ ܗܲܠ ܕܝܼܘܲܬܝ ܐܸܫܬܵܐ ܝܲܢ ܫܲܒ݂ܥܵܐ ܫܵܒ݂ܘܿܥܹ̈ܐ ܒܛܝܼܢܬܵܐ ܡܸܢ ܩܲܕ݇ܡ ܕܥܵܒ݂ܕܲܬܝ ܠܵܗ̇ ܡܲܪܚܲܫܬܵܐ ܒܐܘܼܪܚܵܐ ܕܨܵܪܘܿܝܘܼܬܵܐ. ܐܸܢ ܡܲܪܚܲܫܬܵܐ ܦܝܼܫܠܵܗ̇ ܥܒ݂ܝܼܕܬܵܐ ܡܸܢ ܩܲܕ݇ܡ ܗܵܕܵܟ݂، ܐܝܼܬ ܡܸܬܗܵܘܝܵܢܘܼܬܵܐ ܓܘܼܒ݂ܪܬܵܐ ܕܡܲܪܚܲܫܬܵܐ ܠܹܐ ܗܵܘܝܵܐ ܡܲܢܬܸܝܵܢܬܵܐ.

ܡܘܿܕܝܼ ܝܠܵܗ̇ ܒܸܚܒ݂ܵܫܵܐ ܡܲܪܚܲܫܬܵܐ ܒܐܘܼܪܚܵܐ ܕܨܵܪܘܿܝܘܼܬܵܐ؟

ܡܲܪܚܲܫܬܵܐ ܒܐܘܼܪܚܵܐ ܕܨܵܪܘܿܝܘܼܬܵܐ ܟܹܐ ܦܵܝܫܵܐ ܥܝܵܕܵܐܝܼܬ ܥܒ݂ܝܼܕܬܵܐ ܟܲܕ ܐܲܢ݇ܬܝ ܦܝܼܫܬܵܐ ܝܘܲܬܝ ܡܘܼܬܒ݂ܸܢܬܵܐ ܒܝܲܕ ܚܲܕ ܡܲܬܒ݂ܸܢܵܢܵܐ ܩܲܠܘܼܠܵܐ، ܕܒܸܕ ܡܲܥܒ݂ܸܕܠܵܟ݂ܝ ܕܪܵܓ݂ܫܲܬܝ ܒܢܝܼܚܘܼܬܵܐ ܘܫܸܢܬܵܢܬܵܐ. ܢܝܼܫܵܐ ܕܡܲܬܒ݂ܸܢܵܢܵܐ ܝܼܠܹܗ ܕܪܵܓ݂ܫܲܬܝ ܒܪܲܗܲܬܘܼܬܵܐ ܒܡܸܬܚܵܐ ܕܥܵܡܵܠܝܼܬܵܐ.

ܥܵܡܵܠܝܼܬܵܐ ܟܹܐ ܫܵܩܠܵܐ ܠܗܘܿܢ ܐܸܣܛܵܪܵܐ ܘܚܒ݂ܝܼܫܵܬܹ̈ܐ ܕܡܲܪܒܥܵܐ. ܐܲܝܵܐ ܦܝܼܫܬܵܐ ܝܠܵܗ̇ ܥܒ݂ܝܼܕܬܵܐ ܒܡܲܦܠܲܚܬܵܐ ܕܚܲܕ ܐܲܒܘܼܒܵܐ ܦܠܵܣܬܝܼܟܵܝܵܐ ܙܥܘܿܪܵܐ ܩܵܐ ܠܡܵܨܬܵܐ ܡܲܟܝܼܟ݂ܬܵܐ ܕܓܵܘܵܐ ܕܡܲܪܒܥܵܐ. ܐܲܝܵܐ ܝܼܠܵܗ̇ ܚܕܵܐ ܥܵܡܵܠܝܼܬܵܐ ܫܲܝܢܵܝܬܵܐ ܘܦܫܝܼܛܬܵܐ ܘܩܹܘܲܢܕܹܝܢܘܿܣ ܕܚܲܕ ܚܘܼܙܕܵܓܵܐ ܟܘܼܦܵܐ ܝܠܹܗ ܐܝܼܡܲܢ ܕܦܝܼܫܬܵܐ ܝܠܵܗ̇ ܥܒ݂ܝܼܕܬܵܐ ܒܝܲܕ ܚܲܕ ܐܵܣܝܵܐ ܡܢܲܣܝܵܐ (ܡܵܪܹܐ ܢܸܣܝܵܢܵܐ).

ܥܵܡܵܠܝܼܬܵܐ ܟܹܐ ܡܲܓܪܸܫܵܐ ܩܘܼܪܒܵܐ ܠ 15 ܕܲܩܝܼܡܹ̈ܐ، ܐܝܼܢܵܐ ܐܵܢܲܢܩܵܝܬܵܐ ܝܠܵܗ̇ ܕܗܵܘܝܲܬܝ ܓܵܘ ܒܹܝܬ ܐܵܣܝܘܼܬܵܐ ܝܲܢ ܒܹܝܬ ܟܪ̈ܝܼܗܹܐ ܩܵܐ ܩܘܼܪܒܵܐ ܠܐܲܪܒܲܥ ܣܵܥܲܬܹ̈ܐ ܒܢܝܼܫܵܐ ܠܚܲܬܘܼܬܹܐ ܕܚܲܝܠܵܐ ܕܡܲܬܒ݂ܸܢܵܢܵܐ ܦܪܝܼܩܵܐ ܝܠܹܗ ܘܡܵܨܝܲܬܝ ܕܚܵܙܩܲܬܝ ܠܒܵܝܬܵܐ ܒܫܲܝܢܘܼܬܵܐ.

ܡܸܢ ܒܵܬ݇ܪ ܩܘܼܪܒܵܐ ܠ 16 ܫܵܒ݂ܘܿܥܹ̈ܐ ܕܒܛܝܼܢܘܼܬܵܐ، ܚܕܵܐ ܥܵܡܵܠܝܼܬܵܐ ܦܪܝܼܫܬܵܐ ܦܝܼܫܬܵܐ ܝܠܵܗ̇ ܡܘܼܦܠܸܚܬܵܐ. ܥܵܡܵܠܝܼܬܵܐ ܪܵܒܵܐ ܓܵܗܹ̈ܐ ܟܹܐ ܗܵܘܝܵܐ ܒܘܼܫ ܩܸܛܪܵܢܬܵܐ ܘܒܘܼܫ ܥܲܣܩܵܐ. ܛܝܼܡܵܐ ܕܡܲܪܚܲܫܬܵܐ ܒܐܘܼܪܚܵܐ ܕܨܵܪܘܿܝܘܼܬܵܐ ܟܠܵܢܵܐܝܼܬ ܒܘܼܫ ܟܹܐ ܙܵܝܸܕ ܐܲܝܟ݂ ܟܡܵܐ ܕܡܸܬܚܵܐ ܕܒܛܝܼܢܘܼܬܵܟ݂ܝ ܒܘܼܫ ܒܸܪܝܵܟ݂ܵܐ ܝܠܹܗ.

ܐܲܝܟܵܐ ܡܵܨܝܲܢܝ ܕܥܵܒ݂ܕܲܢܝ ܠܵܗ̇ ܡܲܪܚܲܫܬܵܐ ܒܐܘܼܪܚܵܐ ܕܨܵܪܘܿܝܘܼܬܵܐ؟

ܡܲܪܚܲܫܬܵܐ ܒܐܘܼܪܚܵܐ ܕܨܵܪܘܿܝܘܼܬܵܐ ܡܵܨܝܵܐ ܕܦܵܝܫܵܐ ܥܒ݂ܝܼܕܬܵܐ ܓܵܘ ܐܘܼܚܕܵܢܵܐ ܕ NSW ܓܵܘ ܒܵܬܲܝ̈ ܐܵܣܝܘܼܬܵܐ ܕܐܝܼܬ ܓܵܘ ܟܢܘܼܫܬܵܐ ܘܚܲܕܟܡܵܐ ܓܵܗܹ̈ܐ ܓܵܘ ܒܵܬܲܝ̈ ܟܪ̈ܝܼܗܹܐ ܥܲܡܡܵܝܹ̈ܐ. ܓܵܘ ܐܘܼܚܕܵܢܵܐ ܕ NSW ܠܵܐ ܝܘܲܬܝ ܣܢܝܼܩܬܵܐ ܠܚܕܵܐ ܐܸܓܲܪܬܵܐ ܕܡܲܦܫܲܛܬܵܐ ܡܸܢ ܚܲܕ ܐܵܣܝܵܐ ܗܵܕܟ݂ܵܐ ܕܡܵܨܝܲܬܝ ܕܣܲܚܒܸܪܲܬܝ ܚܲܕ ܒܹܝܬ ܐܵܣܝܘܼܬܵܐ. ܒܚܲܒܪܹ̈ܐ ܐ݇ܚܹܪ݇ܢܸ̈ܐ، ܡܵܨܝܲܬܝ ܕܩܵܪܝܲܬܝ ܚܲܕ݇ܪܹܫܵܐ ܩܵܐ ܒܹܝܬ ܐܵܣܝܘܼܬܵܐ ܠܡܲܪܝܘܼܙܹܐ ܘܲܥܕܵܐ. ܚܲܕܟܡܵܐ ܒܵܬܲܝ̈ ܐܵܣܝܘܼܬܵܐ ܐܲܚܟ̰ܝܼ ܟܹܐ ܥܵܒ݂ܕܝܼ ܡܲܪ̈ܚܲܫܝܵܬܹܐ ܒܐܘܼܪܚܵܐ ܕܨܵܪܘܿܝܘܼܬܵܐ ܩܵܐ ܗܲܠ 12 ܫܵܒ݂ܘܿܥܹ̈ܐ ܕܒܛܝܼܢܘܼܬܵܐ، ܟܲܕ ܐ݇ܚܹܪ݇ܢܹ̈ܐ ܒܸܕ ܥܵܒ݂ܕܝܼܠܵܗ̇ ܥܵܡܵܠܝܼܬܵܐ ܕܡܲܪܚܲܫܬܵܐ ܩܵܐ ܗܲܠ 20 ܫܵܒ݂ܘܿܥ̈ܐ ܕܒܛܝܼܢܘܼܬܵܐ.

ܕܵܐܟ݂ܝܼ ܡܵܨܝܲܢܝ ܕܫܵܩܠܲܢܝ ܘܲܥܕܵܐ ܩܵܐ ܡܲܪܚܲܫܬܵܐ ܒܐܘܼܪܚܵܐ ܕܨܵܪܘܿܝܘܼܬܵܐ؟