ܢܵܣܘܿܒ݂ܘܼܬܵܐ ܕܒܢܲܝܵ̈ܐ ܘܡܲܣܲܡܬܵܐ ܕܒܵܠܵܐ ܒܡܪܲܒܝܵܢܘܼܬܵܐ

ܐܸܢ ܓܘܼܒܹܐ ܠܵܟ݂ܝ ܕܐܵܙܲܠ݇ܬܝ ܠܵܩܵܕ݇ܡܵܐ ܒܒܛܝܼܢܘܼܬܵܐ ܘܡܲܪܝܸܙܲܬܝ ܕܚܲܕ ܦܲܪܨܘܿܦܵܐ ܐ݇ܚܹܪ݇ܢܵܐ ܡܲܣܸܡ ܒܵܠܵܐ ܠܫܲܒ݂ܪܵܐ، ܡܵܨܝܲܬܝ ܕܡܲܦܠܸܚܲܬܝ ܠܗܘܿܢ ܚܸܠܡܲܬܹ̈ܐ ܕܢܵܣܘܿܒ݂ܘܼܬܵܐ ܕܒܢܲܝܵ̈ܐ (adoption) ܘܕܡܲܣܲܡܬܵܐ ܕܒܵܠܵܐ ܒܡܪܲܒܝܵܢܘܼܬܵܐ (foster care).

ܢܵܣܘܿܒ݂ܘܼܬܵܐ ܕܒܢܲܝܵ̈ܐ

ܡܲܥܢܵܝܵܐ ܕܢܵܣܘܿܒ݂ܘܼܬܵܐ ܕܒܢܲܝܵ̈ܐ ܝܼܠܹܗ ܕܐܲܢ݇ܬܝ ܒܸܝܵܗܒ݂ܲܝܗܝ ܝܘܲܬܝ ܟܠܲܝܗܝ ܙܸܕܩܹ̈ܐ ܘܡܸܫܬܲܐܠܵܢܘܵܬܹ̈ܐ ܕܐܲܒ݂ܵܗܘܼܬܵܐ ܩܵܐ ܐܲܒ݂ܵܗܹ̈ܐ ܢܵܣܘܿܒ݂ܹ̈ܐ.

ܢܵܣܘܿܒ݂ܘܼܬܵܐ ܕܒܢܲܝܵ̈ܐ ܒܸܚܒ݂ܵܫܵܐ ܝܠܵܗ̇ ܓܪܵܫܬܵܐ ܕܪܡܵܝ ܐܝܼܕܵܐ ܥܲܠ ܚܲܕ ܣܘܼܙܓܵܪܵܐ ܩܵܢܘܿܢܵܝܵܐ ܩܵܐ ܕܚܲܕ ܦܲܪܨܘܿܦܵܐ ܐ݇ܚܹܪ݇ܢܵܐ ܗܵܘܹܐ ܡܢܲܛܪܵܢܵܐ ܩܵܢܘܿܢܵܝܵܐ ܕܫܲܒ݂ܪܵܐ. ܐܲܒ݂ܵܗܹ̈ܐ ܓܵܪܲܓ ܕܣܵܒܪܝܼ ܩܵܐ ܠܵܐ ܒܵܨܘܿܪܵܐ ܡܸܢ 30 ܝܵܘܡܵܢܹ̈ܐ ܡܸܢ ܒܵܬ݇ܪ ܕܫܲܒ݂ܪܵܐ ܦܝܼܫܵܐ ܝܠܹܗ ܝܠܝܼܕܵܐ ܡܸܢ ܩܲܕ݇ܡ ܕܐܵܢܝܼ ܡܵܨܝܼ ܓܵܪܫܝܼ ܪܡܵܝ ܐܝܼܕܵܐ ܥܲܠ ܣܘܼܙܓܵܪܵܐ ܩܵܢܘܿܢܵܝܵܐ.

ܐܸܢ ܐܲܢ݇ܬܝ ܓܲܒܘܼܝܹܐ ܝܘܲܬܝ ܢܵܣܘܿܒ݂ܘܼܬܵܐ ܕܒܢܲܝܵ̈ܐ، ܡܵܨܝܲܬܝ ܕܚܲܡܝܲܬܝ ܠܹܗ ܝܵܗܒ݂ܫܩܵܠܵܟ݂ܝ ܥܲܡ ܫܲܒ݂ܪܵܐ ܒܣܲܙܓܲܪܬܵܐ ܥܲܠ ܚܲܕ ܚܘܼܛܵܛܵܐ ܕܢܵܣܘܿܒ݂ܘܼܬܵܐ ܕܒܢܲܝܵ̈ܐ ܥܲܡ ܐܲܒ݂ܵܗܹ̈ܐ ܢܵܣܘܿܒ݂ܹ̈ܐ. ܚܲܕ ܦܲܠܵܚܵܐ ܕܨܒܘܼܬܵܐ ܡܵܨܹܐ ܗܲܝܸܪ ܒܡܲܪܝܲܙܬܵܐ ܕܐܵܗܵܐ ܚܘܼܛܵܛܵܐ.

ܡܦܲܪܢܣܵܢܘܼܬܵܐ ܕܟܢܘܼܫܝܵܬܹ̈ܐ ܘܕܟܹܐܢܘܼܬܵܐ ܝܼܠܵܗ̇ ܗܵܝ ܘܲܟܝܼܠܘܼܬܵܐ ܪܘܼܫܡܵܝܬܵܐ ܕܫܘܼܠܛܵܢܵܐ ܕܟܹܐ ܡܕܲܒܪܵܐ ܠܗܘܿܢ ܚܸܠܡܲܬܹ̈ܐ ܕܢܵܣܘܿܒ݂ܘܼܬܵܐ ܕܒܢܲܝܵ̈ܐ ܓܵܘ ܐܘܼܚܕܵܢܵܐ ܕ NSW. ܐܵܢܝܼ ܟܹܐ ܦܵܠܚܝܼ ܥܲܡ ܐܲܒ݂ܵܗܹ̈ܐ ܟܝܵܢܵܝܹ̈ܐ ܕܬܲܚܡܘܼܢܹܐ ܝܢܵܐ ܒܘܼܬ ܢܵܣܘܿܒ݂ܘܼܬܵܐ ܕܒܢܲܝܵ̈ܐ ܘܥܲܡ ܒܲܝܬܘܼܝܵܬܹ̈ܐ ܕܡܲܚܘܼܒܹܐ ܝܢܵܐ ܕܗܵܘܝܼ ܐܲܒ݂ܵܗܹ̈ܐ ܢܵܣܘܿܒ݂ܹ̈ܐ.

ܸܢ ܒܸܪܓ݂ܵܫܵܐ ܝܘܲܬܝ ܕܠܹܐ ܡܵܨܝܲܬܝ ܕܗܵܘܝܲܬܝ ܐܲܒ݂ܵܗܵܐ ܩܵܐ ܚܲܕ ܫܲܒ݂ܪܵܐ، ܢܵܣܘܿܒ݂ܘܼܬܵܐ ܕܒܢܲܝܵ̈ܐ ܠܵܐ ܝܠܹܗ ܗܵܘ ܓܘܼܒܵܝܵܐ ܝܼܚܝܼܕܵܝܵܐ ܕܡܵܨܝܲܬܝ ܥܵܒ݂ܕܲܬܝ ܠܹܗ. ܡܲܣܲܡܬܵܐ ܕܒܵܠܵܐ ܒܡܪܲܒܝܵܢܘܼܬܵܐ (foster care) ܡܵܨܝܵܐ ܕܗܵܘܹܐ ܚܲܕ ܓܘܼܒܵܝܵܐ ܐ݇ܚܹܪ݇ܢܵܐ.

ܡܲܣܲܡܬܵܐ ܕܒܵܠܵܐ ܒܡܪܲܒܝܵܢܘܼܬܵܐ

ܡܲܣܲܡܬܵܐ ܕܒܵܠܵܐ ܒܡܪܲܒܝܵܢܘܼܬܵܐ ܟܹܐ ܗܵܘܝܵܐ ܐܝܼܡܵܢ ܕܚܕܵܐ ܒܲܝܬܘܼܬܵܐ ܐ݇ܚܹܪ݇ܬܵܐ ܡܲܣܘܼܡܹܐ ܝܠܵܗ̇ ܒܵܠܵܐ ܠܫܲܒ݂ܪܵܟ݂ܝ.

ܐܝܼܬ ܦܸܨܠܹ̈ܐ ܦܪ̈ܝܼܫܹܐ ܕܡܲܣܲܡܬܵܐ ܕܒܵܠܵܐ ܒܡܪܲܒܝܵܢܘܼܬܵܐ. ܓܘܼܒܵܝܹ̈ܐ ܕܡܲܣܲܡܬܵܐ ܕܒܵܠܵܐ ܒܡܪܲܒܝܵܢܘܼܬܵܐ ܒܸܚܒ݂ܵܫܵܐ ܝܢܵܐ:

• ܡܲܣܲܡܬܵܐ ܕܒܵܠܵܐ ܒܡܪܲܒܝܵܢܘܼܬܵܐ ܙܵܒ݂ܢܵܢܵܝܬܵܐ: ܐܲܝܵܐ ܡܲܪܝܲܙܬܵܐ ܡܵܨܝܵܐ ܕܦܵܝܫܐ ܥܒ݂ܝܼܕܬܵܐ ܟܲܕ ܐܲܢ݇ܬܝ ܨܲܦܘܼܝܲܝܗܝ ܝܘܲܬܝ ܩܸܛܪܹ̈ܐ ܕܒܹܝܬ ܡܲܫܪܝܵܐ، ܝܲܢ ܩܸܛܪܹ̈ܐ ܟܹܣܦܵܢܵܝܸ̈ܐ ܝܲܢ ܦܲܪ̈ܨܘܿܦܵܝܹܐ. ܒܡܸܬܚܵܐ ܕܡܲܣܲܡܬܵܐ ܕܒܵܠܵܐ ܨܸܒ݂ܝܵܢܵܝܬܵܐ (ܠܵܐ ܝܠܵܗ̇ ܦܩܝܼܕܬܵܐ ܒܝܲܕ ܒܹܝܬ ܕܝܼܢܵܐ)، ܐܲܢ݇ܬܝ ܦܝܵܫܵܐ ܝܘܲܬܝ ܡܢܲܛܪܵܢܬܵܐ ܕܫܲܒ݂ܪܵܟ݂ܝ ܘܡܵܨܝܲܬܝ ܕܚܲܙܝܲܬܝ ܠܹܗ ܫܲܒ݂ܪܵܟ݂ܝ. ܡܲܣܲܡܬܵܐ ܕܒܵܠܵܐ ܙܵܒ݂ܢܵܢܵܝܬܵܐ ܥܝܵܕܵܐܝܼܬ ܟܹܐ ܡܲܓܪܸܫܵܐ ܩܵܐ ܠܵܐ ܙܵܘܕܵܐ ܡܸܢ ܚܲܕܟܡܵܐ ܫܵܒ݂ܘܿܥܹ̈ܐ.
• ܡܲܣܲܡܬܵܐ ܕܒܵܠܵܐ ܒܡܪܲܒܝܵܢܘܼܬܵܐ ܩܵܐ ܚܲܕ ܙܲܒ݂ܢܵܐ ܝܲܪܝܼܟ݂ܵܐ: ܐܸܢ ܫܲܒ݂ܪܵܟ݂ܝ ܦܝܵܫܵܐ ܝܠܹܗ ܡܘܼܣܸܡܵܐ ܒܵܠܵܐ ܩܵܐ ܚܲܕ ܙܲܒ݂ܢܵܐ ܝܲܪܝܼܟ݂ܵܐ، ܒܸܕ ܛܵܠܩܲܠܬܝ ܠܵܗ̇ ܡܢܲܛܪܵܢܘܼܬܵܐ ܩܵܢܘܿܢܵܝܬܵܐ ܘ\ܝܲܢ ܪܵܥܝܘܼܬܵܐ ܕܫܲܒ݂ܪܵܟ݂ܝ. ܐܲܢ݇ܬܝ ܠܗܵܠܵܐ ܒܸܕ ܦܵܝܫܲܬܝ ܐܲܒ݂ܵܗܵܐ ܩܵܢܘܿܢܵܝܵܐ ܕܫܲܒ݂ܪܵܐ. ܫܲܒ݂̈ܪܹܐ ܕܝܼܢܵܐ ܓܵܘ ܡܲܣܲܡܬܵܐ ܕܒܵܠܵܐ ܒܡܪܲܒܝܵܢܘܼܬܵܐ ܩܵܐ ܚܲܕ ܙܲܒ݂ܢܵܐ ܝܲܪܝܼܟ݂ܵܐ ܟܹܐ ܗܵܘܝܼ ܪܸܓ݂ܫܵܢܵܐܝܼܬ ܐ݇ܣܝܼܪܹܐ ܒܒܲܝܬܘܼܬܲܝܗܝ ܒܡܪܲܒܝܵܢܘܼܬܵܐ.

ܡܲܘܕܥܵܢܘܼܬܵܐ ܒܘܼܬ ܢܵܣܘܿܒ݂ܘܼܬܵܐ ܕܒܢܲܝܵ̈ܐ\ܡܲܣܲܡܬܵܐ ܕܒܵܠܵܐ ܒܡܪܲܒܝܵܢܘܼܬܵܐ

ܡܦܲܪܢܣܵܢܘܼܬܵܐ ܕܟܢܘܼܫܝܵܬܹ̈ܐ ܘܕܟܹܐܢܘܼܬܵܐ (Department of Communities and Justice (DCJ)) ܟܹܐ ܡܲܩܪܸܒ݂ܵܐ ܚܲܕ ܣܸܕܪܵܐ ܕܚܸܠܡܲܬܹ̈ܐ ܕܢܵܣܘܿܒ݂ܘܼܬܵܐ ܕܒܢܲܝܵ̈ܐ ܘܕܡܲܣܲܡܬܵܐ ܕܒܵܠܵܐ ܒܡܪܲܒܝܵܢܘܼܬܵܐ. ܡܵܨܝܲܬܝ ܕܗܲܡܙܸܡܲܬܝ ܥܲܡ ܚܲܕ ܦܲܠܵܚܵܐ ܡܗܝܼܪܵܐ ܘܡܢܲܣܝܵܐ ܒܘܼܬ ܓܘܼܒܵܝܹ̈ܐ ܕܐܝܼܬܠܵܟ݂ܝ ܩܵܐ ܡܲܣܲܡܬܵܐ ܕܒܵܠܵܐ ܠܫܲܒ݂ܪܵܟ݂ܝ. ܡܲܚܒܸܪܝ ܩܵܐ ܚܸܠܡܲܬܹ̈ܐ ܕܢܵܣܘܿܒ݂ܘܼܬܵܐ ܕܒܢܲܝܵ̈ܐ ܕ DCJ ܥܲܠ ܡܸܢܝܵܢܵܐ 227 003 1800.

ܡܲܘܕܥܵܢܘܼܬܵܐ ܙܵܘܕܵܢܬܵܐ ܒܘܼܬ ܐܘܼܪܚܵܐ ܕܢܵܣܘܿܒ݂ܘܼܬܵܐ ܕܒܢܲܝܵ̈ܐ ܘܡܲܪ̈ܝܲܙܝܵܬܹܐ ܡܫܲܚܠܦܹ̈ܐ ܡܵܨܝܵܐ ܕܦܵܝܫܵܐ ܩܢܝܼܬܵܐ ܥܲܠ ܫܵܘܦܵܐ ܐܹܠܸܟܬܪܘܿܢܵܝܵܐ ܕ DCJ، https://www.facs.nsw.gov.au/families/adoption